Այսօր տեղի ունեցավ Հայաստանի պետական տնտեսագիտական համալսարանի (ՀՊՏՀ) ռեկտոր Դիանա Գալոյանի և iNFOEXPERT ընկերության հիմնադիր-տնօրեն Արամ Գրիգորյանի հանդիպումը:

 

Հանդիպման ժամանակ, երկու կողմերը, կարևորելով որակյալ կրթության և աշխատաշուկայում անհրաժեշտ հմտություններով մասնագետների պահանջարկը՝ պատրաստակամություն հայտնեցին ամուր և շարունակական համագործակցության:

 

Արամ Գրիգորյանը ներկայացրեց iNFOEXPERT-ի գործունեությունը՝ նշելով, որ 26 տարի է, ինչ ընկերությունը մասնագիտացած է 1C ծրագրային հենքի վրա բիզնեսի ավտոմատացման տիպային և անհատականացված լուծումների մշակման, ներդրման, սպասարկման և iNFOEXPERT Ակադեմիայի շրջանակներում նաև ուսուցման գործում:

 

«iNFOEXPERT-ն առաջարկում է ոչ միայն հաշվապահական, այլև ռեսուրսների, գործընկերների փոխհարաբերությունների, կադրերի կառավարման և փաստաթղթաշրջանառության համակարգեր՝ ավտոմատացնելով հաշվառման ու կառավարման գործընթացների ողջ սպեկտրը։ Ընկերությունն այսօր որակյալ կադրերի կարիք ունի և ուրախ է այս ուղղությամբ համագործակցել ՀՊՏՀ-ի հետ»-.ասաց Արամ Գրիգորյանը:

 

ՀՊՏՀ ռեկտորը ներկայացրեց համալսարանի կողմից առաջարկվող մասնագիտական կրթական ծրագրերը՝ նշելով, որ Տնտեսագիտական համալսարանը սպասարկում է այն մասնագիտությունները, որոնց պահանջարկն աշխատաշուկայում մեծ է։

 

Դիանա Գալոյանը մանրամասնեց համալսարանի գործունեությունը՝ կամավորական աշխատանքի, փորձառության կազմակերպման և այլ ուղղություններով՝ ընդգծելով, որ ՀՊՏՀ-ն, հիմնարար գիտելիքից բացի, իր ուսանողներին է փոխանցում նաև աշխատաշուկայում անհրաժեշտ հմտություններ։

 

iNFOEXPERT Ակադեմիան նույնպես լինելով որակյալ կրթության, մասնագիտական գիտելիքների և գործնական հմտությունների ձևավորման և զարգացման դարբնոց, ապահովում է հատուկ պայմաններ ուսանողների համար՝ միաժամանակ նրանց ընձեռելով ընկերության թափուր հաստիքները համալրելու հնարավորությունը։

 

Հանդիպման ավարտին ստորագրվեց համագործակցության հուշագիր, որը, ի թիվս մի շարք ուղղությունների, սահմանում է iNFOEXPERT ընկերությունում ՀՊՏՀ ուսանողների փորձառության, կամավորության և աշխատանքի հնարավորությունները։

 

Երկու կողմերն էլ հույս հայտնեցին, որ այս գործընկերությունն օգտակար կլինի ուսանողների համար և ընդգծեցին հուշագրի երկուստեք շահավետության կարևորությունը։

 

28 Ապրիլի 2023, ՈՒրբաթ | 2769